Skip to content
Robert Burns Home Search

← Back to the work and its versions

Willie Wastle

Cunningham (1855)

Willie Wastle dwalt on Tweed,
  The spot they call’d it Linkum-doddie.
Willie was a wabster guid,
  Cou’d stown a clue wi’ onie bodie;
He had a wife was dour and din,
  O Tinkler Madgie was her mither;
Sic a wife as Willie had,
  I wad nae gie a button for her.

She has an e’e—she has but ane,
  The cat has twa the very colour;
Five rusty teeth, forbye a stump,
  A clapper-tongue wad deave a miller:
A whiskin’ beard about her mou’,
  Her nose and chin they threaten ither—
Sic a wife as Willie had,
  I wad nae gie a button for her.

She’s bow hough’d, she’s hem shinn’d,
  A limpin’ leg, a hand-breed shorter;
She’s twisted right, she’s twisted left,
  To balance fair in ilka quarter:
She has a hump upon her breast,
  The twin o’ that upon her shouther—
Sic a wife as Willie had,
  I wad nae gie a button for her.

Auld baudrans by the ingle sits,
  An’ wi’ her loof her face a-washin’;
But Willie’s wife is nae sae trig,
  She dights her grunzie wi’ a hushion.
Her walie nieves like midden-creels,
  Her face wad fyle the Logan-Water—
Sic a wife as Willie had,
  I wad nae gie a button for her.

Digital text from Project Gutenberg.

View the source edition · p. 257

About this edition

Both editions have four octaves with the two-line refrain. Dick has “Maidgie”, “stoun”, “I wadna”, “Ae limpin leg”, “whiskin beard” and “Logan Water”; Cunningham has “Madgie”, “stown”, “I wad nae”, “A limpin’ leg”, “whiskin’ beard” and “Logan-Water”. Cunningham’s tune heading differs from Dick’s Sic a wife as Willie had. The Ellisland and Linkumdoddie/GideonThomson traditions remain distinct later reports.

Project Gutenberg ebook licence notice