Skip to content
Robert Burns Home Search

← Back to the work and its versions

The Heron Ballads. Ballad Third

Cunningham (1855)

Wha will buy my troggin,
  Fine election ware;
Broken trade o’ Broughton,
  A’ in high repair.
      Buy braw troggin,
        Frae the banks o’ Dee;
      Wha wants troggin
        Let him come to me.

There’s a noble Earl’s
  Fame and high renown
For an auld sang—
  It’s thought the gudes were stown.
      Buy braw troggin, &c.

Here’s the worth o’ Broughton
  In a needle’s ee;
Here’s a reputation
  Tint by Balmaghie.
      Buy braw troggin, &c.

Here’s an honest conscience
  Might a prince adorn;
Frae the downs o’ Tinwald—
  So was never worn.
      Buy braw troggin, &c.

Here’s its stuff and lining,
  Cardoness’ head;
Fine for a sodger
  A’ the wale o’ lead.
      Buy braw troggin, &c.

Here’s a little wadset
  Buittle’s scrap o’ truth,
Pawn’d in a gin-shop
  Quenching holy drouth.
      Buy braw troggin, &c.

Here’s armorial bearings
  Frae the manse o’ Urr;
The crest, an auld crab-apple
  Rotten at the core.
      Buy braw troggin, &c.

Here is Satan’s picture,
  Like a bizzard gled,
Pouncing poor Redcastle,
  Sprawlin’ as a taed.
      Buy braw troggin, &c.

Here’s the worth and wisdom
  Collieston can boast;
By a thievish midge
  They had been nearly lost.
      Buy braw troggin, &c.

Here is Murray’s fragments
  O’ the ten commands;
Gifted by black Jock
  To get them aff his hands.
      Buy braw troggin, &c.

Saw ye e’er sic troggin?
  If to buy ye’re slack,
Hornie’s turnin’ chapman,
  He’ll buy a’ the pack.
      Buy braw troggin,
        Frae the banks o’ Dee;
      Wha wants troggin
        Let him come to me.

Digital text from Project Gutenberg.

View the source edition · p. 192

About this edition

Cunningham’s preface discusses several poems he left out of the collection.

Project Gutenberg ebook licence notice