Skip to content
Robert Burns Home Search

← Back to the work and its versions

Answer to a Poetical Epistle sent to the Author by a Tailor

Cunningham (1855)

What ails ye now, ye lousie b——h,
To thresh my back at sic a pitch?
Losh, man! hae mercy wi’ your natch,
        Your bodkin’s bauld,
I didna suffer ha’f sae much
        Frae Daddie Auld.

What tho’ at times when I grow crouse,
I gie their wames a random pouse,
Is that enough for you to souse
        Your servant sae?
Gae mind your seam, ye prick-the-louse,
        An’ jag-the-flae.

King David o’ poetic brief,
Wrought ‘mang the lasses sic mischief,
As fill’d his after life wi’ grief,
        An’ bluidy rants,
An’ yet he’s rank’d amang the chief
        O’ lang-syne saunts.

And maybe, Tam, for a’ my cants,
My wicked rhymes, an’ druken rants,
I’ll gie auld cloven Clootie’s haunts
        An unco’ slip yet,
An’ snugly sit among the saunts
        At Davie’s hip get.

But fegs, the Session says I maun
Gae fa’ upo’ anither plan,
Than garrin lasses cowp the cran
        Clean heels owre body,
And sairly thole their mither’s ban
        Afore the howdy.

This leads me on, to tell for sport,
How I did wi’ the Session sort,
Auld Clinkum at the inner port
        Cried three times—“Robin!
Come hither, lad, an’ answer for’t,
        Ye’re blamed for jobbin’.”

Wi’ pinch I pat a Sunday’s face on,
An’ snoov’d away before the Session;
I made an open fair confession—
        I scorn’d to lee;
An’ syne Mess John, beyond expression,
        Fell foul o’ me.

Digital text from Project Gutenberg.

View the source edition · p. 129

About this edition

The displayed reply ends with a rule; Cunningham’s introduction includes a separate verse quotation.

Project Gutenberg ebook licence notice