Skip to content
Robert Burns Home Search

← Back to the work and its versions

Willie Chalmers

Cunningham (1855)

Wi’ braw new branks in mickle pride,
  And eke a braw new brechan,
My Pegasus I’m got astride,
  And up Parnassus pechin;
Whiles owre a bush wi’ downward crush
  The doitie beastie stammers;
Then up he gets and off he sets
  For sake o’ Willie Chalmers.

I doubt na, lass, that weel kenn’d name
  May cost a pair o’ blushes;
I am nae stranger to your fame,
  Nor his warm urged wishes.
Your bonnie face sae mild and sweet
  His honest heart enamours,
And faith ye’ll no be lost a whit,
  Tho’ waired on Willie Chalmers.

Auld Truth hersel’ might swear ye’re fair,
  And Honour safely back her,
And Modesty assume your air,
  And ne’er a ane mistak’ her:
And sic twa love-inspiring een
  Might fire even holy Palmers;
Nae wonder then they’ve fatal been
  To honest Willie Chalmers.

I doubt na fortune may you shore
  Some mim-mou’d pouthered priestie,
Fu’ lifted up wi’ Hebrew lore,
  And band upon his breastie:
But Oh! what signifies to you
  His lexicons and grammars;
The feeling heart’s the royal blue,
  And that’s wi’ Willie Chalmers.

Some gapin’ glowrin’ countra laird,
  May warstle for your favour;
May claw his lug, and straik his beard,
  And hoast up some palaver.
My bonnie maid, before ye wed
  Sic clumsy-witted hammers,
Seek Heaven for help, and barefit skelp
  Awa’ wi’ Willie Chalmers.

Forgive the Bard! my fond regard
  For ane that shares my bosom,
Inspires my muse to gie ‘m his dues,
  For de’il a hair I roose him.
May powers aboon unite you soon,
  And fructify your amours,—
And every year come in mair dear
  To you and Willie Chalmers.

Digital text from Project Gutenberg.

View the source edition · p. 127

About this edition

Cunningham’s preface discusses several poems he left out of the collection.

Project Gutenberg ebook licence notice