← Back to the work and its versions
Willie and Annet
Scots Musical Museum, vol. VI (1839) · no. 596
Liv'd ance twa lovers in yon dale.
Liv'd ance twa lovers in yon dale, And they lov'd other weel, Frae ev'ning late to morning aire, Of luving luv'd their fill Frae ev'ning late to morning aire, Of luving luv'd their fill. Now, Willie, gif you luve me weel, As sae it seems to me, Gar build, gar build a bonny ship, Gar build it speedilie. And we will sail the sea sae green, Unto some far countrie, Or we'll sail to some bonie isle Stands finely midst the sea. But lang or ere the ship was built, Or deck'd, or rigged out, Came sick a pain in Annet's back, That down she cou'd na lout. Now, Willie, gif ye luve me weel, As sae it seems to me, O haste, haste, bring me to my bow'r, And my bow'r maidens three. He's taen her in his arms twa, And kiss'd her cheek and chin; He's brocht her to her ain sweet bow'r, But nae bow'r-maid was in. Now, leave my bow'r, Willie, she said, Now leave me to my lane; Was neverman in a lady's bower When she was travelling. He's stepped three steps down the stair, Upon the marble stane: Sae loud's he heard his young son's greet, But and his lady's mane! Now come, now come, Willie, she said, Tak your young son frae me, And hie him to your mothers bower With speed and privacie. He's ta'en his young son in his arms, He's kiss'd him cheek and chin, He's hied him to his mothers bower By the ae light of the moon. And with him came the bold Baron, And he spake up wi' pride, Gar seek, gar seek the bower maidens, Gar busk, gar busk the bride. My maidens, easy with my back, And easy with my side. O set my saddle saft, Willie, I am a tender bride.
View the source edition · Liv'd ance twa lovers in yon dale.; p. 616