Skip to content
Robert Burns Home Search

← Back to the work and its versions

'Tis Nae Very Lang Sinsyne

Scots Musical Museum, vol. VI (1839) · no. 550

'Tis nae very lang sinsyne.

'Tis nae very lang sinsyne,
That I had a lad o' my ain,
But now he's awa to anither,
And left me a' my lane.
The lass he is courting has siller
An' I hae nane at a';
Its nought but the love o' the tocher
That's ta'en my laddie awa.

But I'm blyth, that my heart's my ain,
And I'll keep it a' my life,
Until that I meet wi' a lad
Wha has sense to wale a good wife.
For though I say't mysell,
That shou'd nae say't, tis true,
The lad that gets me for a wife,
He'll ne'er hae occasion to rue:

I gang ay fou clean and fou tosh,
As a' the neighbours can tell;
Though I've seldom a gown on my back
But sic as I spin mysell.
And when I am clad in my courtesie,
I think mysell as braw
As Susie, wi' a' her pearling
That's tane my laddie awa.

But I wish they were buckled together,
And may they live happy for life;
Tho' Willie does slight me, and's left me,
The chield he deserves a good wife.
But, O! I'm blyth that I've miss'd him,
As blyth as I weel can be;
For ane that's sae keen o' the siller
Will never agree wi' me.

But as the truth is, I'm hearty,
I hate to be scrimpit or scant;
The wee thing I hae, I'll mak use o't,
And nae ane about me shall want.
For I'm a good guide o' the warld,
I ken when to had and to gie:
For whinging and cringing for siller
Will never agree wi' me.

Contentment is better than riches,
An' he wha has that has enough;
The master is seldom sae happy
As Robin that drives the plough.
But if a young lad wou'd cast up,
To mak me his partner for life:
If the chield has the sense to be happy,
He'll fa' on his feet for a wife.

View the source edition · 'Tis nae very lang sinsyne.; p. 569