Skip to content
Robert Burns Home Search

← Back to the work and its versions

O Tell Me, My Bonny Young Lassie

Scots Musical Museum, vol. VI (1839) · no. 540

O Tell me my bonny &c.

O tell me my bonny young lassie,
O tell me how for to woo;
O tell me my bonny sweet lassie,
O tell me the way for to woo.
O say maun I roose your red cheeks like the morning,
lips like the rose when its moisten'd wi' dew;
And say maun I roose your een's pauky scorning,
O tell me dear lassie the way for to woo.

O far hae I wander'd dear lassie,
To see thee sail'd the salt sea,
I've travel'd o'er muirlan' an' mountain,
An' houseless lain cauld on the lea;
I never hae try'd yet, to mak' love to ony,
Never loe'd ony, till ance I loe'd you,
An' now we're alane in the greenwood sae bonny,
Now, tell me dear lassie the way for to woo.

What care I, for your wandering, laddie,
Or yet for your sailing the sea,
It was na for nought ye left Peggy,
My tocher it brought ye to me;
An' say, hae ye goud for to busk me ay gaudy,
Ribbons an' pearlin's an' breastknots enow,
A house that is canty, wi' plenishin' plenty,
Without them, ye never need come for to woo.

I hae nae goud to busk ye ay gaudy,
Nor yet, buy ribbons enow,
I brag not o' house or o' plenty,
But, I hae a heart that is true;
I came na for tocher, I ne'er heard of ony,
Never loe'd Peggy, nor e'er brak my vow;
I've wander'd, poor fool, for a face fause as bonny;
I little thought this was the way for to woo.

Hae na ye roos'd my cheeks like the morning,
An' roos'd my cherry red mow,
Ye've come o'er the Sea, Muir, and Mountain,
What mair Johnny need ye to woo;
An' far hae ye wander'd I ken, my dear laddie,
Now ye hae found me, ye've nae cause to rue.
Wi' health we'll hae plenty, I'll never gang gaudy,
I ne'er wish'd for mair than a heart that is true.

She hid her fair face in his bosom,
The tear fill'd ilk lover's ee,
An' sabb'd by the side o' the burnie,
While the mavis sang sweet on the tree;
He clasp'd her, he press'd her an' ca'd her his honey,
Look'd in her face wi' a heart leel an' true,
As aften she sigh'd an' said, my dear Johnny,
Nae body need tell ye the way for to woo.

View the source edition · O Tell me my bonny &c.; pp. 558,559