Skip to content
Robert Burns Home Search

← Back to the work and its versions

Lord Thomas and Fair Annet

Scots Musical Museum, vol. VI (1839) · no. 535

Lord Thomas and fair Annet.

Lord Thomas and fair Annet
Sat a day on a hill
Whan night was come and the sun was set,
They had not talk'd their fill.

Lord Thomas said a word in jest,
Fair Annet took it ill;
A. I will never wed a wife
Against my ain friends will.

Gif ye will never wed a wife,
A wife will ne'er wed yee.
Sae he is hame to tell his mither,
An' kneis'd upon his knee:

O rede, O rede, mither, he says,
A gude rede gie to me.
O sall I tak the nut-browne bride,
And let fair Annet be?

The nut-browne bride has gowd & gear,
Fair Annet she's gat nane,
And the little bewtie fair Annet has,
O it will soon be gane.

And he has to his brither gane,
Now, brither, rede ye me,
A' sall I marrie the nut-browne bride,
And let fair Annet be?

The nut-browne bride has oxen, brother,
The nut-browne bride has kye,
I wad hae ye marrie the nut-browne bride,
And cast fair Annet by.

Her oxen may dye i' the house, Billie,
And her kye into the byre,
And I sall hae naething to mysell
But a fat fadge by the fyre.

And he has till his sister gane:
Now, sister, rede ye me,
O sall I marrie the nut-browne bride,
And set fair Annet free?

Ise rede ye tak fair Annet, Thomas,
And let the browne bride alane,
Lest ye sould sigh, and say, Alas
What is this we brought hame?

No, I will tak my mither's counsel,
And marrie me out o' hand,
And I will tak the nut-browne bride,
Fair Annet may leive the land.

Up then rose fair Annet's father
Twa hours or it wereday,
And he is gane into the bower
Wherein fair Annet lay.

Rise up, rise up, fair Annet, he says,
Put on your silken sheene,
Let us gae to St Marie's kirk,
And see that rich weddene.

My maids gae to my dressing-room,
And dress to me my hair,
Whair-re ye laid a plait before,
See ye lay ten times mair.

My maids, gae to my dressing-room,
And dress to me my smock,
The one half is o' the holland fine,
The other o' needle-work.

The horse fair Annet rade upon,
He amblit like the wind,
Wi' siller he was shod before,
Wi' burning gowd behind.

Four-and-twenty siller bells
Were tied till his mane,
Wi' yae tift o' the norland wind,
They tinkled ane by ane.

Four-and-twenty gay gude knights
Rade by fair Annets side,
And four and twenty fair ladies,
As gin she had bin a bride.

And whan she cam to Marie's kirk,
She sat on Marie's stean,
The cleading that fair Annet had on
It skinkled in their een.

And whan she cam into the kirke,
She skimmer'd like the sun,
The belt that was about her waist
Was a' wi' pearles bedone.

She sat her by the nut-browne bride,
And her een they wer sae clear,
Lord Thomas he clear forgat the bride,
When fair Annet drew near.

He had a rose into his hand,
He gae it kisses three,
And reaching by the nut-browne bride,
Laid it on fair Annets knee.

Up then spak the nut browne bride,
She spak wi' meikle spite,
And whair gat ye that rose-water
That does mak yee sae white?

O I did get the rose-water
Whar ye wull neir get nane,
For I did get that very rose-water
Into my mither's wame.

The bride she drew a long bodkin
Frae out her gay head-gear,
And strake fair Annet unto the heart,
That word spak never mair.

Lord Thomas saw fair Annet wax pale,
And marvelit what mote bee,
But whan he saw her dear hearts blude,
A' wood wroth wexed hee.

He drew his dagger that was sae sharp,
That was sae sharp and meet,
And drave it into the nut browne bride,
That fell deid at his feit.

Now stay for me, dear Annet, he said,
Now stay, my dear, he cry'd;
Then strake the dagger until his heart,
And fell deid by hir side.

Lord Thomas was bury'd without kirk-wa',
Fair Annet within the quire;
And o' the tane thair grew a birk,
The other a bonny briere.

And ay they grew, and ay they threw,
As they wad faine be neare,
And by this ye may ken right weil,
They wer twa luvers deare.

View the source edition · Lord Thomas and fair Annet.; pp. 553,554