Skip to content
Robert Burns Home Search

← Back to the work and its versions

My Daddy Left Me Gear Enough

Scots Musical Museum, vol. VI (1839) · no. 526

My Daddy left me &c.

My daddy left me gear enough
a couter and an auld beam plough
a nebbed staff a nutting tyne
'a fishing wand wi' hook and line
Wi' twa auld stools and a dirt house
'a jerkinet scarce worth a louse
an auld pat that wants the lug
'a spurtle and a sowen mug.

A hempken heckle, and a mell,
A tar-horn, and a weather's bell,
A muck-fork, and an auld peet creel,
The spakes of our auld spinning wheel.
A pair of branks, yea, and a saddle,
With our auld brunt and broken laddle,
A whang-bit, and a sniffle-bit;
Chear up, my bairns, and dance a fit.

A flailing-staff and a timmer spit,
An auld kirn and a hole in it,
Yarn-winnles, and a reel,
A tritter-lock, a trump of steel,
A whistle, and a tup horn spoon,
With an auld pair of clouted shoon,
A timmer spate, and a gleg shear,
A bonnet for my bairns to wear.

A timmer tong, a broken cradle,
The pillions of an auld car-saddle,
A gullic-knife and a horse-wand,
A mitten for the left hand,
With an auld broken pan of brass,
With an auld sark that wants the arse,
An auld-band, and a hoodling how,
I hope, my bairns, ye're a weel now.—

Aft have I borne ye on my back,
With a' this riff-raff in my pack;
And it was a' for want of gear,
That gart me steal Mess John's grey mare
But now, my bairns, what ails ye now
For ye hae naigs enough to plow:
And hose and shoon fit for your feet,
Chear up, my bairns, and dinna greet.

Then with mysel I did advise,
My daddy's gear for to comprize;
Some neighbours I ca'd in to see
What gear my daddy left to me.
They sat three quarters of a year,
Comprizing of my daddy's gear;
And when they had gien a' their votes,
'Twas scarcely a' worth four pounds scots.

View the source edition · My Daddy left me &c.; pp. 542,543