← Back to the work and its versions
Tho' for Seven Years and Mair
Scots Musical Museum, vol. VI (1839) · no. 507
Tho' for seven years.
Tho' for seven years and mair honour shou'd reave me, To fields where cannons rair thou need na grieve thee: For deep in my spirits thy sweets are indented, And love shall, preserve ay what love has imprinted,
CHORUS
Leave thee leave thee I'll never leave thee gang the warld as it will dearest believe me.
NELLY.
O Johny! I'm jealous whene'er ye discover My sentiments yielding, ye'll turn a loose rover; And nought i' the warld wad vex my heart sairer If you prove unconstant, and fancy ane fairer. Grieve me, grieve me, oh it wad grieve me! A' the lang night and day, if you deceive me.
JOHNY.
My Nelly, let never sick fancies oppress ye, For while my blood's warm I'll kindly caress ye: Your blooming saft beauties first beeted Love's fire, Your virtue and wit make it ay flame the higher, Leave thee, leave thee, I'll never leave thee, Gang the warld as it will, dearest, believe me.
NELLY.
Then, Johny, I frankly this minute allow ye To think me your mistress, for love gars me trow ye; And gin you prove fa'se, to ye'rself be it said then; Ye'll win but sma' honour to wrang a kind maiden. Reave me, reave me, Heav'ns! it wad reave me Of my rest night and day, if ye deceive me.
JOHNY.
Bid iceshogles hammer red gads on the studdy, And fair simmer mornings nae mair appear ruddy; Bid Britons think ae gait, and when they obey ye, But never till that time believe I'll betray ye. Leave thee, leave thee, I'll never leave thee; The starns shall gang withershins e'er I deceive thee.
Complete dialogue and chorus from Museum no. 507, including the score continuation.
View the source edition · Tho' for seven years.; pp. 522,523
About this edition
Complete dialogue and chorus from Museum no. 507, including the score continuation.