← Back to the work and its versions
Our lords are to the mountains gane
Dick (1903) · no. 339
Our lords are to the mountains gane.
Our lords are to the mountains gane, A hunting o' the fallow deer; And they hae gripit Hughie Graham, For stealing o' the bishop's mare. And they hae tied him hand and foot, And led him up thro' Stirling town; The lads and lassies met him there, Cried 'Hughie Graham thou art a loun.' 'O lowse my right hand free,' he says, 'And put my braid sword in the same, He's no in Stirling town this day, Daur tell the tale to Hughie Graham.' Up then bespake the brave Whitefoord, As he sat by the bishop's knee; 'Five hundred white stots I'll gie you, If ye'll let Hughie Graham gae free.' 'O haud your tongue,' the bishop says, 'And wi' your pleading let me be; For tho' ten Grahams were in his coat, Hughie Graham this day shall die.' Up then bespake the fair Whitefoord, As she sat by the bishop's knee, 'Five hundred white pence I'll gie you, If ye'll gie Hughie Graham to me.' 'O haud your tongue now lady fair, And wi' your pleading let it be; Altho' ten Grahams were in his coat, It's for my honor he maun die.' They've taen him to the gallows knowe, He lookèd to the gallows tree, Yet never color left his cheek, Nor ever did he blin' his e'e. At length he lookèd round about, To see whatever he could spy, And there he saw his auld fathèr, And he was weeping bitterly. 'O haud your tongue, my father dear And wi' your weeping let it be; For tho' they rob me o' my life, They cannot o' the Heaven hie. And ye may gie my brother John My sword that's bent in the middle clear, And let him come at twelve o'clock, And see me pay the bishop's mare. 'And ye may gie my brother James My sword that's bent in the middle brown, And bid him come at four o'clock, And see his brother Hugh cut down. 'Remember me to Maggy, my wife, The niest time ye gang o'er the moor, Tell her she staw the bishop's mare, Tell her she was the bishop's whore. 'And ye may tell my kith and kin I never did disgrace their blood; And when they meet the bishop's cloak, To make it shorter by the hood.'
View the source edition · Our lords are to the mountains gane.