Skip to content
Robert Burns Home Search

← Back to the work and its versions

When we gaed to the braes o’ Mar

Dick (1903) · no. 283

When we gaed to the braes o' Mar.

CHORUS

Up, and warn a', Willie,
Warn, warn a';
To hear my canty Highland sang
Relate the thing I saw, Willie.

When we gaed to the braes o' Mar,
And to the weapon-shaw, Willie;
Wi' true design to serve the king
And banish Whigs awa, Willie.
Up, and warn a', Willie,
Warn, warn a';
For lords and lairds came there bedeen,
And wow! but they were braw, Willie.

But when the standard was set up,
Right fierce the wind did blaw, Willie,
The royal nit upon the tap
Down to the ground did fa', Willie.
Up, and warn a', Willie,
Warn, warn a';
Then second-sighted Sandie said
We'd do nae gude at a', Willie.

But when the army join'd at Perth,
The bravest e'er ye saw, Willie,
We didna doubt the rogues to rout,
Restore our king and a', Willie.
Up, and warn a', Willie,
Warn, warn a';
The pipers play'd frae right to left
O whirry Whigs awa, Willie.

But when we march'd to Sherramuir
And there the rebels saw, Willie;
Brave Argyle attack'd our right,
Our flank, and front and a', Willie;
Up, and warn a', Willie,
Warn, warn a';
Traitor Huntly soon gave way,
Seaforth, St. Clair and a', Willie.

But brave Glengary on our right
The rebels' left did claw, Willie;
He there the greatest slaughter made
That ever Donald saw, Willie;
Up, and warn a', Willie,
Warn, warn a';
And Whittam fyled his breeks for fear,
And fast did rin awa, Willie.

For he ca'd us a Highland mob,
And soon he'd slay us a', Willie;
But we chas'd him back to Stirling brig—
Dragoons, and foot, and a', Willie.
Up, and warn a', Willie,
Warn, warn a';
At length we rallied on a hill,
And briskly up did draw, Willie.

But when Argyle did view our line
And them in order saw, Willie,
He straight gaed to Dumblane again,
And back his left did draw, Willie.
Up, and warn a', Willie,
Warn, warn a';
Then we to Auchterairder march'd
To wait a better fa', Willie.

Now if ye spier wha wan the day,
I've tell'd you what I saw, Willie,
We baith did fight, and baith did beat,
And baith did rin awa, Willie.
Up, and warn a', Willie,
Warn, warn a';
For second-sighted Sandie said
We'd do nae gude at a', Willie.

View the source edition · When we gaed to the braes o' Mar.

View historical scores

Dick’s Songs of Robert Burns (1903)

When we gaed to the braes o' Mar.

Full printed page 266 from Dick’s 1903 song collection, preserving words and any notation.
James C. Dick, The Songs of Robert Burns (1903), printed p. 266.National Library of Scotland.

View source · Download citation

Download score page (.jpg)