← Back to the work and its versions
Duncan Gray
Dick (1903) · no. 179
Duncan Gray cam here to woo
Ha, ha, the wooing o’t!
On blythe yule-night when we were fou
Ha, ha, the wooing o’t!
Maggie coost her head fu’ high,
Look’d asklent and unco skeigh,
Gart poor Duncan stand abeigh—
Ha, ha, the wooing o’t!
Duncan fleech’d, and Duncan pray’d—
Ha, ha, the wooing o’t!
Meg was deaf as Ailsa Craig
Ha, ha, the wooing o’t!
Duncan sigh’d baith out and in,
Grat his een baith bleer’t and blin’,
Spak o’ lowpin o’er a linn—
Ha, ha, the wooing o’t!
Time and chance are but a tide,
Ha, ha, the wooing o’t!
Slighted love is sair to bide
Ha, ha, the wooing o’t!
‘Shall I, like a fool,’ quoth he,
‘For a haughty hizzie die?
She may gae to—France for me!—
Ha, ha, the wooing o’t!
How it comes, let doctors tell,
Ha, ha, the wooing o’t!
Meg grew sick, as he grew hale
Ha, ha, the wooing o’t!
Something in her bosom wrings,
For relief a sigh she brings,
And O! her een they spak sic things!—
Ha, ha, the wooing o’t!
Duncan was a lad o’ grace,
Ha, ha, the wooing o’t;
Maggie’s was a piteous case,
Ha, ha, the wooing o’t:
Duncan couldna be her death,
Swelling pity smoor’d his wrath;
Now they’re crouse and canty baith—
Ha, ha, the wooing o’t.View the source edition · no. 179; pp. 160–161
About this edition
Both give five eight-line stanzas. Dick has “hale” and “couldna”; Cunningham prints “heal” and “could na”. This Duncan Gray cam here to woo is distinct from Dick’s no. 173, Weary fa’ you, Duncan Gray. Its tune reference links them musically; it does not merge their words or give this entry its own score.