Skip to content
Robert Burns Home Search

← Poems & songs

To William Simpson, Ochiltree

Behind the poem

Burns and William Simpson, the schoolmaster at Ochiltree, have rivers worth putting into verse: Irvine, Lugar, Ayr and Doon. After thanking Simpson for his praise, Burns asks him to help give their own country a place beside the Scottish rivers already famous in poetry. [1]

Read the fuller story

Dated May 1785, the poem begins with literary companionship. Ramsay and Fergusson stand among its examples; Fergusson’s neglect draws an angry rebuke to Edinburgh’s prosperous inhabitants. From there the speaker names Irvine, Lugar, Ayr and Doon as waters waiting for song, and recalls Wallace as part of the region’s remembered past.[1]

Summer life and winter storms both offer material to the attentive poet. Solitary wandering beside a burn becomes a way of finding the muse. The epistle ends its main address with a pledge of friendship explicitly signed in Robert Burns’s name.[1]

A substantial postscript changes register to explain the disputed New Light through a moon fable. Rival shepherds argue over whether each vanished moon is replaced or returns by turning. Their quarrel grows violent, then ends in an absurd plan to visit the moon by balloon and bring back evidence in a pocket. The comic explanation makes learned controversy look quarrelsome and impractical.[1]

Cunningham identifies Simpson as the schoolmaster of Ochiltree and later New Lanark, and discusses his own verse with little admiration. The epistle’s welcome to a “rhyme-composing brither” preserves a warmer relation between the correspondents.[1]

Story references
  1. Allan Cunningham, ed., The Complete Works of Robert Burns (1855), printed 101–103; HTML #XXXII. Digital transcription; selected complete text and headnote.

Poem

Cunningham (1855)

TO

WILLIAM SIMPSON,

OCHILTREE.

I gat your letter, winsome Willie;
Wi’ gratefu’ heart I thank you brawlie;
Tho’ I maun say’t, I wad be silly,
        An’ unco vain,
Should I believe, my coaxin’ billie,
        Your flatterin’ strain.

But I’se believe ye kindly meant it,
I sud be laith to think ye hinted
Ironic satire, sidelins sklented
        On my poor Musie;
Tho’ in sic phraisin’ terms ye’ve penn’d it,
        I scarce excuse ye.

My senses wad be in a creel,
Should I but dare a hope to speel,
Wi’ Allan, or wi’ Gilbertfield,
        The braes o’ fame;
Or Fergusson, the writer chiel,
        A deathless name.

(O Fergusson! thy glorious parts
Ill suited law’s dry, musty arts!
My curse upon your whunstane hearts,
        Ye Enbrugh gentry!
The tythe o’ what ye waste at cartes
        Wad stow’d his pantry!)

Yet when a tale comes i’ my head,
Or lasses gie my heart a screed,
As whiles they’re like to be my dead
        (O sad disease!)
I kittle up my rustic reed,
        It gies me ease.

Auld Coila, now, may fidge fu’ fain,
She’s gotten poets o’ her ain,
Chiels wha their chanters winna hain,
        But tune their lays,
Till echoes a’ resound again
        Her weel-sung praise.

Nae poet thought her worth his while,
To set her name in measur’d stile;
She lay like some unkenn’d-of isle
        Beside New-Holland,
Or whare wild-meeting oceans boil
        Besouth Magellan.

Ramsay an’ famous Fergusson
Gied Forth and Tay a lift aboon;
Yarrow an’ Tweed, to monie a tune,
        Owre Scotland rings,
While Irwin, Lugar, Ayr, an’ Doon,
        Nae body sings.

Th’ Ilissus, Tiber, Thames, an’ Seine,
Glide sweet in monie a tunefu’ line!
But, Willie, set your fit to mine,
        An’ cock your crest,
We’ll gar our streams an’ burnies shine
        Up wi’ the best.

We’ll sing auld Coila’s plains an’ fells,
Her moor’s red-brown wi’ heather bells,
Her banks an’ braes, her dens an’ dells,
        Where glorious Wallace
Aft bure the gree, as story tells,
        Frae southron billies.

At Wallace’ name, what Scottish blood
But boils up in a spring-tide flood!
Oft have our fearless fathers strode
        By Wallace’ side,
Still pressing onward, red-wat shod,
        Or glorious dy’d.

O sweet are Coila’s haughs an’ woods,
When lintwhites chant amang the buds,
And jinkin’ hares, in amorous whids
        Their loves enjoy,
While thro’ the braes the cushat croods
        With wailfu’ cry!

Ev’n winter bleak has charms to me
When winds rave thro’ the naked tree;
Or frosts on hills of Ochiltree
        Are hoary gray:
Or blinding drifts wild-furious flee,
        Dark’ning the day.

O Nature! a’ thy shews an’ forms
To feeling, pensive hearts hae charms!
Whether the summer kindly warms,
        Wi’ life an’ light,
Or winter howls, in gusty storms,
        The lang, dark night!

The muse, nae Poet ever fand her,
’Till by himsel’ he learn’d to wander,
Adown some trotting burn’s meander,
        An’ no think lang;
O sweet, to stray an’ pensive ponder
        A heart-felt sang!

The warly race may drudge an’ drive,
Hog-shouther, jundie, stretch an’ strive,
Let me fair Nature’s face descrive,
        And I, wi’ pleasure,
Shall let the busy, grumbling hive
        Bum owre their treasure.

Fareweel, my “rhyme-composing brither!”
We’ve been owre lang unkenn’d to ither:
Now let us lay our heads thegither,
        In love fraternal;
May envy wallop in a tether,
        Black fiend, infernal!

While Highlandmen hate tolls an’ taxes;
While moorlan’ herds like guid fat braxies;
While terra firma, on her axes
        Diurnal turns,
Count on a friend, in faith an’ practice,
        In Robert Burns.

POSTSCRIPT

My memory’s no worth a preen:
I had amaist forgotten clean,
Ye bade me write you what they mean,
        By this New Light,
‘Bout which our herds sae aft hae been,
        Maist like to fight.

In days when mankind were but callans,
At grammar, logic, an’ sic talents,
They took nae pains their speech to balance,
        Or rules to gie,
But spak their thoughts in plain, braid Lallans,
        Like you or me.

In thae auld times, they thought the moon,
Just like a sark, or pair o’ shoon,
Wore by degrees, ’till her last roon,
        Gaed past their viewing,
An’ shortly after she was done,
        They gat a new one.

This past for certain—undisputed;
It ne’er cam i’ their heads to doubt it,
’Till chiels gat up an’ wad confute it,
        An’ ca’d it wrang;
An’ muckle din there was about it,
        Baith loud an’ lang.

Some herds, weel learn’d upo’ the beuk,
Wad threap auld folk the thing misteuk;
For ’twas the auld moon turned a neuk,
        An’ out o’ sight,
An’ backlins-comin’, to the leuk,
        She grew mair bright.

This was deny’d, it was affirm’d;
The herds an’ hissels were alarm’d:
The rev’rend gray-beards rav’d and storm’d
        That beardless laddies
Should think they better were inform’d
        Than their auld daddies.

Frae less to mair it gaed to sticks;
Frae words an’ aiths to clours an’ nicks,
An’ monie a fallow gat his licks,
        Wi’ hearty crunt;
An’ some, to learn them for their tricks,
        Were hang’d an’ brunt.

This game was play’d in monie lands,
An’ Auld Light caddies bure sic hands,
That, faith, the youngsters took the sands
        Wi’ nimble shanks,
’Till lairds forbade, by strict commands,
        Sic bluidy pranks.

But New Light herds gat sic a cowe,
Folk thought them ruin’d stick-an’-stowe,
Till now amaist on every knowe,
        Ye’ll find ane plac’d;
An’ some their New Light fair avow,
        Just quite barefac’d.

Nae doubt the Auld Light flocks are bleatin’;
Their zealous herds are vex’d an’ sweatin’:
Mysel’, I’ve even seen them greetin’
        Wi’ girnin’ spite,
To hear the moon sae sadly lie’d on
        By word an’ write.

But shortly they will cowe the loons;
Some Auld Light herds in neibor towns
Are mind’t in things they ca’ balloons,
        To tak a flight,
An’ stay ae month amang the moons
        And see them right.

Guid observation they will gie them:
An’ when the auld moon’s gaun to lea’e them,
The hindmost shaird, they’ll fetch it wi’ them,
        Just i’ their pouch,
An’ when the New Light billies see them,
        I think they’ll crouch!

Sae, ye observe that a’ this clatter
Is naething but a “moonshine matter;”
But tho’ dull prose-folk Latin splatter
        In logic tulzie,
I hope we bardies ken some better
        Than mind sic brulzie.

Digital text from Project Gutenberg.

View the source edition · p. 101

About this edition

This reading presents the section headings as separate titles and leaves out the Roman stanza numbers and typographic emphasis.

Project Gutenberg ebook licence notice

Burns’s epistle to William Simpson

The main epistle closes by offering friendship in Robert Burns’s name. Its separately headed postscript supplies the moon allegory.

Words Robert Burns, as named in the printed epistle
Burns’s role Burns’s epistle to William Simpson

pp. 101–103

← Poems & songs