Skip to content
Robert Burns Home Search

← Back to the work and its versions

Yestreen I met you on the moor

Dick (1903) · no. 4

CHORUS

O Tibbie, I hae seen the day,
Ye wadna been sae shy;
For laik o' gear ye lightly me,
But, trowth, I care na by.

Yestreen I met you on the moor,
Ye spak na but gaed by like stoure:
Ye geck at me because I'm poor,
But fient a hair care I.

When comin hame on Sunday last,
Upon the road as I cam past,
Ye snufft an' gae your head a cast—
But, trowth, I care't na by.

I doubt na, lass, but ye may think,
Because ye hae the name o' clink,
That ye can please me at a wink,
Whene'er ye like to try.

But sorrow tak him that's sae mean,
Altho' his pouch o' coin were clean,
Wha follows ony saucy quean,
That looks sae proud and high!

Altho' a lad were e'er sae smart,
If that he want the yellow dirt,
Ye'll cast your head anither airt,
And answer him fu' dry.

But if he hae the name o' gear,
Ye'll fasten to him like a brier,
Tho' hardly he, for sense or lear,
Be better than the kye.

But, Tibbie, lass, tak my advice,
Your daddie's gear maks you sae nice;
The deil a ane wad speir your price,
Were ye as poor as I.

There lives a lass beside yon park,
I'd rather hae her in her sark
Than you, wi' a' your thousand mark
That gars you look sae high.

View the source edition · Dick1903 no. 4; p. 4

About this edition

Syllables separated by the musical notation are joined into words in this reading.

View historical scores

Dick’s Songs of Robert Burns (1903)

Dick1903 no. 4; p. 4

Full printed page 4 from Dick’s 1903 song collection, preserving words and any notation.
James C. Dick, The Songs of Robert Burns (1903), printed p. 4.National Library of Scotland.

View source · Download citation

Download score page (.jpg)