Skip to content
Robert Burns Home Search

← Back to the work and its versions

The Fête Champêtre

Cunningham (1855)

O wha will to Saint Stephen’s house,
  To do our errands there, man?
O wha will to Saint Stephen’s house,
  O’ th’ merry lads of Ayr, man?
Or will we send a man-o’-law?
  Or will we send a sodger?
Or him wha led o’er Scotland a’
  The meikle Ursa-Major?

Come, will ye court a noble lord,
  Or buy a score o’ lairds, man?
For worth and honour pawn their word,
  Their vote shall be Glencaird’s, man?
Ane gies them coin, ane gies them wine,
  Anither gies them clatter;
Anbank, wha guess’d the ladies’ taste,
  He gies a Fête Champêtre.

When Love and Beauty heard the news,
  The gay green-woods amang, man;
Where gathering flowers and busking bowers,
  They heard the blackbird’s sang, man;
A vow, they seal’d it with a kiss,
  Sir Politicks to fetter,
As theirs alone, the patent-bliss
  To hold a Fête Champêtre.

Then mounted Mirth, on gleesome wing,
  O’er hill and dale she flew, man;
Ilk wimpling burn, ilk crystal spring,
  Ilk glen and shaw she knew, man:
She summon’d every social sprite
  That sports by wood or water,
On th’ bonny banks of Ayr to meet,
  And keep this Fête Champêtre.

Cauld Boreas, wi’ his boisterous crew,
  Were bound to stakes like kye, man;
And Cynthia’s car, o’ silver fu’,
  Clamb up the starry sky, man:
Reflected beams dwell in the streams,
  Or down the current shatter;
The western breeze steals thro’ the trees,
  To view this Fête Champêtre.

How many a robe sae gaily floats!
  What sparkling jewels glance, man!
To Harmony’s enchanting notes,
  As moves the mazy dance, man.
The echoing wood, the winding flood,
  Like Paradise did glitter,
When angels met, at Adam’s yett,
  To hold their Fête Champêtre.

When Politics came there, to mix
  And make his ether-stane, man!
He circled round the magic ground,
  But entrance found he nane, man:
He blush’d for shame, he quat his name,
  Forswore it, every letter,
Wi’ humble prayer to join and share
  This festive Fête Champêtre.

Digital text from Project Gutenberg.

View the source edition · p. 300

About this edition

Cunningham’s preface discusses several poems he left out of the collection.

Project Gutenberg ebook licence notice