Skip to content
Robert Burns Home Search

← Back to the work and its versions

Had I the wyte she bade me

Cunningham (1855)

Had I the wyte, had I the wyte,
  Had I the wyte she bade me;
She watch’d me by the hie-gate side.
  And up the loan she shaw’d me;
And when I wadna venture in,
  A coward loon she ca’d me;
Had kirk and state been in the gate,
  I lighted when she bade me.

Sae craftilie she took me ben,
  And bade me make nae clatter;
“For our ramgunshoch glum gudeman
  Is out and owre the water:”
Whae’er shall say I wanted grace
  When I did kiss and dawte her,
Let him be planted in my place,
  Syne say I was the fautor.

Could I for shame, could I for shame,
  Could I for shame refused her?
And wadna manhood been to blame,
  Had I unkindly used her?
He claw’d her wi’ the ripplin-kame,
  And blue and bluidy bruised her;
When sic a husband was frae hame,
  What wife but had excused her?

I dighted ay her een sae blue,
  And bann’d the cruel randy;
And weel I wat her willing mou’,
  Was e’en like sugar-candy.
A gloamin-shot it was I wot,
  I lighted on the Monday;
But I cam through the Tysday’s dew,
  To wanton Willie’s brandy.

Digital text from Project Gutenberg.

View the source edition · p. 264

Project Gutenberg ebook licence notice