Skip to content
Robert Burns Home Search

← Back to the work and its versions

The tither morn when I forlorn

Cunningham (1855)

    The tither morn,
    When I forlorn,
Aneath an oak sat moaning,
    I did na trow
    I’d see my Jo,
Beside me, gain the gloaming.
    But he sae trig,
    Lap o’er the rig.
And dawtingly did cheer me,
    When I, what reck,
    Did least expec’,
To see my lad so near me.

    His bonnet he,
    A thought ajee,
Cock’d sprush when first he clasp’d me;
    And I, I wat,
    Wi’ fainness grat,
While in his grips be press’d me.
    Deil tak’ the war!
    I late and air
Hae wish’d since Jock departed;
    But now as glad
    I’m wi’ my lad,
As short syne broken-hearted.

    Fu’ aft at e’en
    Wi’ dancing keen,
When a’ were blythe and merry,
    I car’d na by,
    Sae sad was I
In absence o’ my dearie.
    But praise be blest,
    My mind’s at rest,
I’m happy wi’ my Johnny:
    At kirk and fair,
    I’se ay be there,
And be as canty’s ony.

Digital text from Project Gutenberg.

View the source edition · p. 250

Project Gutenberg ebook licence notice