Skip to content
Robert Burns Home Search

← Back to the work and its versions

Robin

Cunningham (1855)

There was a lad was born in Kyle,
But whatna day o’ whatna style
I doubt it’s hardly worth the while
  To be sae nice wi’ Robin.
    Robin was a rovin’ boy,
      Rantin’ rovin’, rantin’ rovin’;
    Robin was a rovin’ boy,
      Rantin’ rovin’ Robin!

Our monarch’s hindmost year but ane
Was five-and-twenty days begun,
Twas then a blast o’ Janwar win’
  Blew hansel in on Robin.

The gossip keekit in his loof,
Quo’ she, wha lives will see the proof.
This waly boy will be nae coof,
  I think we’ll ca’ him Robin

He’ll hae misfortunes great and sma’,
But ay a heart aboon them a’;
He’ll be a credit to us a’,
  We’ll a’ be proud o’ Robin.

But sure as three times three mak nine,
I see by ilka score and line,
This chap will dearly like our kin’,
  So leeze me on thee, Robin.

Guid faith, quo’ she, I doubt you gar,
The bonnie lasses lie aspar,
But twenty fauts ye may hae waur,
  So blessin’s on thee, Robin!
    Robin was a rovin’ boy,
      Rantin’ rovin’, rantin’ rovin’;
    Robin was a rovin’ boy,
      Rantin’ rovin’ Robin!

Digital text from Project Gutenberg.

View the source edition · p. 215

About this edition

Cunningham’s preface discusses several poems he left out of the collection.

Project Gutenberg ebook licence notice