← Back to the work and its versions
Return Hameward
Scots Musical Museum, vol. VI (1839) · no. 553
Return hameward.
Return hameward my heart again An' bide where thou was wont to be Thou art a fool to suffer pain For love o' ane that loves not thee. My heart let be sic fantasie, Love only where thou hast good cause; Since scorn and liking ne'er agree, The fient a crum o' thee she faws. To what effect should thou be thrall? Be happy in thine ain free will, My heart, be never bestial, But ken wha does thee good or ill, At hame with me then tarry still, And see wha can best play their paws, And let the silly fling her fill, For fint a crum of thee she faws. Tho' she be fair I will not fenzie, She's of a kind with mony mae; For why they are a fellon menzie That seemeth good and are not sae. My heart, tak neither sturt nor wae For Meg, for Marjory, or Mause, But be thou blyth, and let her gae, For fint a crum of thee she faws. Remember, how that Medea Wild for a sight of Jason yied, Remember how that young Cressida Left Troilus for Diomede: Remember Helen as we read, Brought Troy from bliss unto bare wa's: Then let her gae where she may speed For fint a crum of thee she faws. Because she said I took it ill, For her depart my heart was sair, But, was beguil'd; gae where she will, Beshrew the heart that first takes care. But be thou merry late and air, This is the final end and clause, And let her feed and foully fair For fint a crum of thee she faws. Ne'er dunt again within my breast, Ne'er let her slights thy courage spill, Nor gie a sob altho' she sneest, She's fairest paid that get's her will She's geck as gif I mean'd her ill, When she glaicks paughty in her braws: Now let her snirt and fyke her fill, For fint a crum of thee she faws.
View the source edition · Return hameward.; p. 572