Skip to content
Robert Burns Home Search

← Back to the work and its versions

For a’ that, and a’ that

Dick (1903) · no. 309

Is there for honest poverty
    That hings his head, an’ a’ that?
The coward slave, we pass him by—
    We dare be poor for a’ that!
      For a’ that, an’ a’ that,
        Our toils obscure, an’ a’ that,
      The rank is but the guinea’s stamp,
        The man’s the gowd for a’ that.

What tho’ on hamely fare we dine,
    Wear hodden grey, an’ a’ that?
Gie fools their silks, and knaves their wine—
    A man’s a man for a’ that!
      For a’ that, an’ a’ that,
        Their tinsel show, an’ a’ that,
      The honest man, tho’ e’er sae poor,
        Is king o’ men for a’ that.

Ye see yon birkie ca’d a lord,
    Wha struts, and stares, an’ a’ that;
Tho’ hundreds worship at his word,
    He’s but a coof for a’ that.
      For a’ that, an’ a’ that,
        His ribband, star, an’ a’ that,
      The man o’ independent mind,
        He looks an’ laughs at a’ that.

A prince can mak a belted knight,
    A marquis, duke, an’ a’ that,
But an honest man’s aboon his might—
    Gude faith, he mauna fa’ that!
      For a’ that, an’ a’ that,
        Their dignities, an’ a’ that,
      The pith o’ sense an’ pride o’ worth
        Are higher rank than a’ that.

Then let us pray that come it may—
    As come it will, for a’ that—
That sense and worth, o’er a’ the earth
    Shall bear the gree, an’ a’ that;
      For a’ that, an’ a’ that,
        It’s comin yet for a’ that,
      That man to man the world o’er,
        Shall brothers be for a’ that.

View the source edition · no. 309; pp. 290–291

About this edition

Cunningham prints “A king can make a belted knight”, where Dick has “A prince can mak”. His “May bear the gree” differs from Dick’s “Shall bear the gree”. “Hoddin gray” and “hodden grey” are edition spellings. Both give five eight-line stanzas.

View historical scores

Dick’s Songs of Robert Burns (1903)

no. 309; pp. 290–291

Full printed page 290 from Dick’s 1903 song collection, preserving words and any notation.
James C. Dick, The Songs of Robert Burns (1903), printed p. 290.National Library of Scotland.

View source · Download citation

Download score page (.jpg)