Skip to content
Robert Burns Home Search

← Back to the work and its versions

The Battle of Sherriff-muir

Dick (1903) · no. 280

'O, cam ye here the fight to shun,
Or herd the sheep wi' me, man?
Or were ye at the Sherra-moor,
Or did the battle see, man?'
'I saw the battle sair and teugh,
And reekin-red ran monie a sheugh;
My heart for fear gae sough for sough,
To hear the thuds, and see the cluds
O' clans frae woods in tartan duds,
Wha glaum'd at kingdoms three, man.

'The red-coat lads wi' black cockauds
To meet them were na slaw, man;
They rush'd and push'd and bluid outgush'd,
And monie a bouk did fa', man;
The great Argyle led on his files,
I wat they glanc'd for twenty miles;
They hough'd the clans like nine-pin kyles,
They hack'd and hash'd, while braid-swords clash'd,
And thro' they dash'd, and hew'd and snash'd,
'Till fey men died awa', man.

'But had ye seen the philabegs
And skyrin tartan trews, man,
When in the teeth they daur'd our Whigs
And covenant True-blues, man!
In lines extended lang and large,
When baignets overpower'd the targe,
And thousands hasten'd to the charge,
Wi' Highland wrath they frae the sheath
Drew blades o' death, till out o' breath
They fled like frighted dows, man.'

'Oh, how deil, Tam, can that be true?
The chase gaed frae the North, man;
I saw mysel, they did pursue
The horseman back to Forth, man;
And at Dunblane, in my ain sight,
They took the brig wi' a' their might,
And straught to Stirling wing'd their flight;
But, cursed lot! the gates were shut;
And monie a huntit poor red-coat
For fear amaist did swarf, man!'

'My sister Kate cam up the gate
Wi' crowdie unto me, man:
She swoor she saw some rebels run
To Perth and to Dundee, man!
Their left-hand general had nae skill;
The Angus lads had nae good-will
That day their neibor's blude to spill;
For fear by foes that they should lose
Their cogs o' brose, they scar'd at blows,
And hameward fast did flee, man.

'They've lost some gallant gentlemen,
Amang the Highland clans, man;
I fear my Lord Panmure is slain,
Or in his en'mies' hands, man:
Now wad ye sing this double fight,
Some fell for wrang, and some for right,
But monie bade the world gude-night;
Say, pell and mell, wi' muskets' knell,
How Tories fell, and Whigs to hell
Flew off in frighted bands, man!'

View the source edition · no. 280; pp. 262–263

About this edition

Dick prints six ten-line stanzas; Cunningham’s last stanza has eleven lines. Dick has Or did the battle see, teugh, cockauds, bluid, Argyle, snash’d, daur’d, dows and baignets overpower’d; Cunningham has And did, tough, cockades, blude, Argyll, smash’d, dar’d, doos and bayonets opposed. Their Kate stanzas and final four/five lines differ materially. Dick’s speaker turns are preserved as printed, including quotes carried across stanzas. Dick prints swoor in Kate’s report, where Cunningham has swore, and a colon after en’mies’ hands, man.

View historical scores

Dick’s Songs of Robert Burns (1903)

no. 280; pp. 262–263

Full printed page 262 from Dick’s 1903 song collection, preserving words and any notation.
James C. Dick, The Songs of Robert Burns (1903), printed p. 262.National Library of Scotland.

View source · Download citation

Download score page (.jpg)