← Back to the work and its versions
Green Grow the Rashes
Dick (1903) · no. 111
Chorus. Green grow the rashes, O!
Green grow the rashes, O!
The sweetest hours that e’er I spend,
Are spent amang the lasses, O!
There’s nought but care on ev’ry han’,
In ev’ry hour that passes, O;
What signifies the life o’ man,
An ’twere na for the lasses, O?
The warl’y race may riches chase,
An’ riches still may fly them, O;
An’ tho’ at last they catch them fast,
Their hearts can ne’er enjoy them, O.
But gie me a cannie hour at e’en,
My arms about my dearie, O;
An’ warl’y cares, an’ warl’y men,
May a’ gae tapsalteerie, O!
For you sae douce, ye sneer at this,
Ye’re nought but senseless asses, O;
The wisest man the warl’ saw,
He dearly lov’d the lasses, O!
Auld Nature swears, the lovely dears
Her noblest work she classes, O:
Her prentice han’ she tried on man,
An’ then she made the lasses, O.View the source edition · no. 111; p. 102
About this edition
Cunningham prints “canny”, “warly” and “try’d”; Dick has “cannie”, “warl’y” and “tried”. Cunningham’s fourth verse includes “the warl’ e’er saw”; Dick has “the warl’ saw”. Cunningham repeats the chorus after the last verse. The1787 witness retains its inherited screening status.
View historical scores
Dick’s Songs of Robert Burns (1903)
no. 111; p. 102
