Skip to content
Robert Burns Home Search

← Back to the work and its versions

Epistle to J. R******

Kilmarnock Poems (1786)

EPISTLE TO J. R******,

ENCLOSING SOME POEMS.

O Roagh, rude, ready-witted R******,
The wale o’ cocks for fun an’ drinkin!
There’s monie godly folks are thinkin,
    Your dreams * an’ tricks
Will send you, Korah-like, a sinkin,
    Straught to auld Nick’s.

Ye hae sae monie cracks an’ cants,
And in your wicked, drunken rants,
Ye mak a devil o’ the Saunts,
    An’ fill them fou;
And then their failings, flaws an’ wants,
    Are a’ seen thro’.

Hypocrisy, in mercy spare it!
That holy robe, O dinna tear it!
Spare’t for their sakes wha aften wear it,
    The lads in black;
But your curst wit, when it comes near it,
    Rives’t aff their back.

Think, wicked Sinner, wha ye’re skaithing:
It’s just the Blue-gown badge an’ claithing,
O’ Saunts; tak that, ye lea’e them naething,
    To ken them by,
Frae ony unregenerate Heathen,
    Like you or I.

I’ve sent you here, some rhymin ware,
A’ that I bargain’d for, an’ mair;
Sae when ye hae an hour to spare,
    I will expect,
Yon Sang * ye’ll sen’t, wi’ cannie care,
    And no neglect.

Tho’ faith, sma’ heart hae I to sing!
My Muse dow scarcely spread her wing:
I’ve play’d mysel a bonie spring,
    An’ danc’d my fill!
I’d better gaen an’ sair’t the king,
    At Bunker’s hill.

’Twas ae night lately, in my fun,
I gaed a rovin wi’ the gun,
An’ brought a Paitrick to the grun’,
    A bonie hen,
And, as the twilight was begun,
    Thought nane wad ken.

The poor, wee thing was little hurt;
I straiket it a wee for sport,
Ne’er thinkan they wad fash me for’t;
    But, Deil-na-care!
Somebody tells the Poacher-Court,
    The hale affair.

Some auld, us’d hands had taen a note,
That sic a hen had got a shot;
I was suspected for the plot;
    I scorn’d to lie;
So gat the whistle o’ my groat,
    An’ pay’t the fee.

But by my gun, o’ guns the wale,
An’ by my pouther an’ my hail,
An’ by my hen, an’ by her tail,
    I vow an’ swear!
The Game shall Pay, owre moor an’ dail,
    For this, niest year.

As soon’s the clockin-time is by,
An’ the wee powts begun to cry,
L—d, I’se hae sportin by an’ by,
    For my gowd guinea;
Tho’ I should herd the buckskin kye
    For’t, in Virginia!

Trowth, they had muckle for to blame!
’Twas neither broken wing nor limb,
But twa-three draps about the wame
    Scarce thro’ the feathers
An’ baith a yellow George to claim,
    An’ thole their blethers!

It pits me ay as mad’s a hare;
So I can rhyme nor write nae mair;
But pennyworths again is fair,
    When time’s expedient:
Meanwhile I am, respected Sir,
    Your most obedient.

Complete verse epistle: 78 lines in thirteen stanzas, with its subtitle and two footnotes.

View the source edition · pp. 218–222; PDF 225–229, ending with the upper six lines on PDF 229

About this edition

The last six lines stand at the top of printed page 222, before a separate song. The surname remains masked; the notes describe a dream and a promised song.

Edition footnotes

* A certain humorous dream of his was then making a noise in the world.

* A Song he had promised the Author.