O’er the moor amang the heather Dick · 1903 · no.356 O'er the moor amang the heather. Comin thro' the craigs o' Kyle, Amang the bonie blooming heather, There I met a bonie lassie, Keeping a' her yowes thegither. CHORUS O'er the moor amang the heather; O'er the moor amang the heather; There I met a bonie lassie Keeping a' her yowes thegither. Says I, 'My dear whare is thy hame, In moor, or dale, pray tell me whether?' She says, 'I tent thae fleecy flocks That feed amang the blooming heather.' CHORUS O'er the moor amang the heather, O'er the moor amang the heather; She says, 'I tent thae fleecy flocks, That feed amang the blooming heather.' We laid us down upon a bank, Sae warm and sunny was the weather; She left her flocks at large to rove Amang the bonie blooming heather. CHORUS O'er the moor amang the heather, O'er the moor amang the heather; She left her flocks at large to rove Amang the bonie blooming heather. While thus we lay, she sang a sang, Till echo ran a mile and farther; And ay the burden o' the sang Was, O'er the moor amang the heather. CHORUS O'er the moor amang the heather, O'er the moor amang the heather; And ay the burden o' the sang Was, O'er the moor amang the heather. She charm'd my heart, and ay sinsyne, I could na think on ony ither: By sea and sky she shall be mine! The bonie lass amang the heather. CHORUS O'er the moor amang the heather, O'er the moor amang the heather; By sea and sky she shall be mine! The bonie lass amang the heather. O'er the moor amang the heather.; PDF pp. 400,401 https://deriv.nls.uk/dcn23/9125/91259652.23.pdf#page=400