Willie Wastle Dick · 1903 · no. 213 Willie Wastle dwalt on Tweed, The spot they ca'd it Linkumdoddie; Willie was a wabster gude Could stoun a clue wi' ony bodie: He had a wife was dour and din, O, Tinkler Maidgie was her mither; Sic a wife as Willie had, I wadna gie a button for her. She has an e'e—she has but ane,— The cat has twa the very colour, Five rusty teeth, forbye a stump, A clapper tongue wad deave a miller; A whiskin beard about her mou', Her nose and chin they threaten ither: Sic a wife as Willie had, I wadna gie a button for her. She's bow-hough'd, she's hem-shinn'd, Ae limpin leg a hand-breed shorter; She's twisted right, she's twisted left, To balance fair in ilka quarter: She has a hump upon her breast, The twin o' that upon her shouther: Sic a wife as Willie had, I wadna gie a button for her. Auld baudrans by the ingle sits, An' wi' her loof her face a-washin; But Willie's wife is nae sae trig, She dights her grunzie wi' a hushion; Her walie nieves like midden-creels, Her face wad fyle the Logan Water: Sic a wife as Willie had, I wadna gie a button for her. No. 213; printed pp. 190–191; PDF pp. 246–247 https://deriv.nls.uk/dcn23/9125/91259652.23.pdf#page=246