The Blind Harper Dick edition (1903) · no. 351 O, heard ye of a silly harper Liv'd long in Lochmaben town? How he did gang to fair England To steal King Henry's wanton brown. But first he gaed to his gudewife Wi' a' the speed that he could thole:— 'This wark,' quo' he, 'will never work Without a mare that has a foal.' Quo' she, 'thou has a gude grey mare That'll rin o'er hills baith low and hie; Gae tak the grey mare in thy hand, And leave the foal at hame wi' me.' 'And tak a halter in thy hose, And o' thy purpose dinna fail, But wap it o'er the wanton's nose, And tie it to the grey mare's tail. 'Syne ca' her out at yon back yeate, O'er moss and muir and ilka dale, For she'll ne'er let the wanton bite, Till she come hame to her ain foal.' So he is up to England gane, Even as fast as he can hie, Till he came to King Henry's yeate— And wha was there but King Henry? 'Come in,' quo' he, 'thou silly blind harper, And o' thy harping let me hear': 'O! by my sooth,' quo' the silly blind harper, 'I'd rather hae stabling for my mare.' The king looks o'er his left shoulder, And says unto his stable groom;— 'Gae tak the silly poor harper's mare, And tie her 'side my wanton brown.' And ay he harpèd, and ay he carpit, Till a' the lords gaed through the floor; They thought the music was sae sweet That they forgat the stable door. And ay he harpit, and ay he carpit, Till a' the nobles were sound asleep; Then quietly he took aff his shoon, And saftly down the stair did creep. Syne to the stable door he hies Wi' tread as light as light could be, And when he open'd and gaed in, There he fand thirty good steeds and three. He took the halter frae his hose, And of his purpose did na fail; He slipt it o'er the wanton's nose, And tied it to his grey mare's tail. He ca'd her out at yon back yeate O'er moss and muir & ilka dale; And she loot ne'er the wanton bite, But held her still gaun at her tail. The grey mare was right swift o' fit, And did na fail to find the way, For she was at Lochmaben yeate Fu' lang three hours ere it was day. When she came to the harper's door, There she gae many a nicher and snear; 'Rise,' quo' the wife, 'thou lazy lass, Let in thy master and his mare.' Then up she raise, pat on her claes, And lookit out through the lock-hole: 'O! by my sooth, then,' quo' the lass, 'Our mare has gotten a braw big foal.' 'Come haud thy peace thou foolish lass, The moon's but glancing in thy e'e; I'd wad my haill fee 'gainst a groat It's bigger than e'er our foal will be.' The neighbours too that heard the noise Cried to the wife to put her in; 'By my sooth, then,' quoth the wife, 'She's better than ever he rade on.' But on the morn at fair daylight, When they had ended a' their cheer: King Henry's wanton brown was stawn, And eke the poor auld harper's mare. 'Alace! alace!' says the silly blind harper; 'Alace! alace! that I came here, In Scotland I've tint a braw cowte foal, In England they've stawn my gude grey mare.' 'Come haud thy tongue, thou silly blind harper, And of thy alacing let me be, For thou shall get a better mare, And weel paid shall thy cowte foal be. For thou shall get a better mare, And weel paid shall thy cowte foal be.' Dick1903 no.351; printed 338–340; PDF394–396 https://deriv.nls.uk/dcn23/9125/91259652.23.pdf#page=394