Saw Ye the Thane o' Meikle Pride The Scotish Musical Museum · 1839 · volume VI Saw ye the Thane &c. Saw ye the Thane o' meikle pride, Red anger in his ee? I saw him not nor care he cry'd Red anger frights na me. For I have stood whar honour bade, Tho' death trod on his heel; Mean is the crest that stoops to fear, Nae sic may Duncan feel. Hark! hark! or was it but the wind, That through the ha' did sing; Hark! hark! agen, a warlike sound, The black woods round do ring. 'Tis na for naught, bauld Duncan cry'd, Sic shouting on the wind. Syne up he started frae his seat, A throng of spears behind. Haste, haste, my valiant hearts, he said, Anes mair to follow me; We'll meet yon shouters by the burn, I guess wha they may be. But wha is he that speids sae fast, Frae the slaw marching thrang? Sae frae the mirk cloud shoots a beam, The sky's blue face alang. Some messenger it is, mayhap, Then not at peace I trow. My master, Duncan bade me rin, And say these words to you. Restore again that blooming rose, Your rude hand pluckt awa; Restore again his Mary fair, Or you shall rue his fa'. Three strides the gallant Duncan tuk, He struck his forward spear: Gae tell thy master, beardless youth, We are nae wont to fear. He comes na on a wassail rout, Of revel, sport, and play; Our swords gart Fame proclaim us men, Lang ere this ruefu' day. The rose I pluckt o' right is mine, Our hearts together grew, Like twa sweet roses on ae stak Frae hate to love she flew. Swift as a winged shaft he sped; Bald Duncan said in jeer, Gae tell thy master, beardless youth, We are nae wont to fear. Saw ye the Thane &c.; printed pp. 594,594; PDF pp. 94,94 https://digital.nls.uk/87799447#page=94