Colin Clout The Scotish Musical Museum · 1839 · volume VI Colin Clout Chanticleer, wi' noisy whistle Bids the housewife rise in haste; Colin Clout begins to hirsle Slawly frae his sleepless nest. Love that raises sic a clamour, Drivin lads an' lasses mad; Ah waes my heart had coost his glammir O'er poor Colin luckless lad. Cruel Jenny, lack a daisy! Lang had gart him greet an grane, Colins pate was hafflins crazy, Jenny laugh'd at Colins pain, Slawly up his duds he gathers, Slawly, slawly trudges out, An' frae the fauld he drives his wedders Happier far than Colin Clout. Now the sun, rais'd frae his nappie, Set the Orient in a low, Drinkin, ilka glancin drappie, I' the field, an' a' the knowe. Mony a birdie, sweetly singin, Flatter'd briskly round about; An' mony a dainty flow'rie springin, A' were blythe but Colin Clout. What is this? cries Colin glow'rin', Glaiked-like, a' round about, Jenny, this is past endurin; Death maun ease poor Colin Clout. A' the night I toss an' tummle, Never can I close an ee An' a' the day I grane an' grummle, Jenny, this is a' for thee. Ye'll hae nane but farmer Patie, Cause the fallow's rich I trow, Ablins, tho' he shou'd na cheat ye, Jenny, ye'll hae cause to rue. Auld, an' gley'd, an' crooked-backed, Siller bought at sic a price, Ah! Jenny gin ye lout to tak it, Fok will say ye're no o'er nice. Colin Clout; printed pp. 568,568; PDF pp. 68,68 https://digital.nls.uk/87799447#page=68