Come under My Plaidy The Scotish Musical Museum · 1839 · volume VI Come under my plaidy. Come under my plaidy, the night's ga'en to fa'; Come in frae the cauld blast, the drift and the snaw; Come under my plaidy, and lye down beside me; There's room in't dear lassie, believe me for twa Come under my plaidy, and lye down beside me I'll hap ye frae ev'ry cauld blast that will blaw. O come under my plaidy, and lye down beside me there's room in't dear lassie believe me for twa. 'Gae 'wa wi' your plaidy! auld Donald gae' wa! 'I fear na the cauld blast, the drift, nor the snaw. 'Gae 'wa wi' your plaidy! I'll no lye beside ye, 'Ye may be my gutchard, auld Donald gae 'wa. 'I'm ga'en to meet Johnny, he's young and he's bonny, 'He's been at Meg's bridal, fou trig and fou braw! 'O there's nane dance sae lightly, sae gracefu', sae tightly, 'His cheek's like the new rose, his brow's like the snaw. "Dear Marion let that flee stick fast to the wa, "Your Jock's but a gowk, and has naething ava, "The haill o' his pack he has now on his back, "He's thretty, and I'm but threescore and twa. "Be frank now and kindly, I'll busk you aye finely; "At kirk or at market they'll few gang sae braw; "A bein house to bide in, a chaise for to ride in, "And flunkies to tend ye as aft as ye ca'. 'My father's ay tell'd me, my mither and a', 'Ye'd mak' a gude husband, and keep me ay braw, 'It's true I loo Johnny he's gude and he's bonny, 'But waes me! ye ken he has naething ava! 'I hae little tocher, you've made a gude offer, 'I'm now mair than twenty, my time is but sma' 'Sae gie me your plaidie, I'll creep in beside ye. 'I thought ye'd been aulder than threescore and twa.' She crap in ayont him, beside the stane wa' Whar Johnny was list'ning and heard her tell a', The day was appointed, his proud heart it dunted, And strack 'gainst his side as if bursting in twa. He wander'd hame weary, the night it was dreary! And thowless, he tint his gate deep 'mang the snaw, The Howlet was screaming, while Johnny cried, "Women "Wa'd marry auld nick if he'd keep them ay braw." "O the de'ils in the lasses! they gang now sae bra', "They'll ly down wi' auld men o' fourscore and twa, "The haill o' their marriage, is gowd and a carriage, "Plain love is the cauldest blast now that can blaw! "But lo'e them I canna nor marry I winna "Wi' ony daft lassie: tho' fair as a Queen, "Till love hae a share o't, the never a hair o't "Shall gang in my wallet at morning or e'en. Come under my plaidy.; printed pp. 550,551; PDF pp. 50,51 https://digital.nls.uk/87799447#page=50