Ae Day a Braw Wooer The Scotish Musical Museum · 1839 · volume VI Ae day a braw wooer, &c. By Burns. Ae day a braw wooer came down the lang glen, And sair wi' his love he did deave me; But I said there was naething I hated like men, The deuce gae wi' him to believe me believe me, The deuce gae wi' him to believe me. A weel stocket mailen himsel o't the laird, An' bridal aff han' was the proffer, I never loot on, that I kend or I car'd, But thought I might get a waur offer. He spake o' the darts o' my bonny black een, An' o for my love he was diein'; I said, he might die when he liket for Jean, The gude forgie me for liein'. But what do ye think, in a fortnight or less, (The die'l's in his taste to gae near her) He's down to the castle to black cousin Bess, Think how the jade I cou'd endure her. An' a' the niest ouk as I freted wi' care, I gade to the tryst o' Dulgarlock; An' wha but my bra' fickle wooer was there, Wha glowr'd as if he'd seen a warlock. Out owre my left shouther I gie'd him a blink, Lest neighbour shou'd think I was saucy; My wooer he caper'd as he'd been in drink, An' vow'd that I was a dear lassie. I spier'd for my cousin, fu' couthie an' sweet, An' if she'd recover'd her hearin'; An' how my auld shoon fitted her shachel'd feet Gude saf' us how he fell a swearin'. He begg'd me for gudesake that I'd be his wife, Or else I wad kill him wi' sorrow; An' just to preserve the poor bodie in life, I think I will wed him to morrow. Ae day a braw wooer, &c.; printed pp. 538,539; PDF pp. 38,39 https://digital.nls.uk/87799447#page=38