Had I the Wyte she Bade Me Dick edition (1903) · no. 199 Had I the wyte, had I the wyte, Had I the wyte?—she bade me; She watch'd me by the hie-gate side, And up the loan she shaw'd me; And when I wadna venture in, A coward loon she ca'd me: Had kirk and state been in the gate, I'd lighted when she bade me. Sae craftilie she took me ben And bade me mak nae clatter:— 'For our ramgunshoch, glum guidman Is o'er ayont the water:' Whae'er shall say I wanted grace, When I did kiss and dawte her, Let him be planted in my place, Syne say I was the fautor! Could I for shame, could I for shame, Could I for shame refus'd her? And wadna manhood been to blame Had I unkindly used her? He claw'd her wi' the ripplin-kame, And blae and bluidy bruised her— When sic a husband was frae hame, What wife but wad excused her? I dighted ay her een sae blue, An' bann'd the cruel randy; And, weel I wat, her willin mou' Was sweet as sugar-candy. At gloamin-shot it was, I wot, I lighted on the Monday, But I cam thro' the Tyesday's dew To wanton Willie's brandy. Dick1903 no.199; printed 178–179; PDF234–235 https://deriv.nls.uk/dcn23/9125/91259652.23.pdf#page=234