When Guilford Good Our Pilot Stood 1787 Edinburgh edition — printed fragment A FRAGMENT. I. WHEN Guilford good our Pilot stood, An’ did our hellim thraw, man, Ae night, at tea, began a plea, Within America, man: Then up they gat the maskin-pat, And in the sea did jaw, man; An’ did nae less, in full Congress, Than quite refuse our law, man. II. Then thro’ the lakes Montgomery takes, I wat he was na slaw, man; Down Lowrie’s burn he took a turn, And C-rl-t-n did ca’, man: But yet, whatreck, he, at Quebec, Montgomery-like did fa’, man, Wi’ sword in hand, before his band, Amang his en’mies a’, man. III. Poor Tammy G-ge within a cage Was kept at Boston-ha’, man; Till Willie H--e took o’er the knowe For Philadelphia, man: Wi’ sword an’ gun he thought a sin Guid Christian bluid to draw, man; But at New-York, wi’ knife an’ fork, Sir Loin he hacked sma’, man. IV. B-rg--ne gaed up, like spur an’ whip, Till Fraser brave did fa’, man; Then lost his way, ae misty day, In Saratoga shaw, man. C-rnw-ll-s fought as lang’s he ought, An’ did the Buckskins claw, man; But Cl-nt-n’s glaive frae rust to save He hung it to the wa’, man. V. Then M-nt-gue, an’ Guilford too, Began to fear a fa’, man; And S-ckv-lle doure, wha stood the stoure, The German Chief to thraw, man: For Paddy B-rke, like ony Turk, Nae mercy had at a’, man; An’ Charlie F-x threw by the box, An’ lows’d his tinkler jaw, man. VI. Then R-ck-ngh-m took up the game; Till Death did on him ca’, man; When Sh-lb-rne meek held up his cheek, Conform to Gospel law, man: Saint Stephen’s boys, wi’ jarring noise, They did his measures thraw, man, For N-rth an’ F-x united stocks, An’ bore him to the wa’, man. VII. Then Clubs an’ Hearts were Charlie’s cartes, He swept the stakes awa’, man, Till the Diamond’s Ace, of Indian race, Led him a sair faux pas, man: The Saxon lads, wi’ loud placads, On Chatham’s Boy did ca’, man; An’ Scotland drew her pipe an’ blew, ‘Up, Willie, waur them a’, man!’ VIII. Behind the throne then Gr-nv-lle’s gone, A secret word or twa, man; While slee D-nd-s arous’d the class Be-north the Roman wa’, man: An’ Chatham’s wraith, in heav’nly graith, (Inspired Bardies saw, man) Wi’ kindling eyes cry’d, ‘Willie, rise! ‘Would I hae fear’d them a’, man?’ IX. But, word an’ blow, N-rth, F-x, and Co. Gowff’d Willie like a ba’, man, Till Suthron raise, an’ coost their claise Behind him in a raw, man: An’ Caledon threw by the drone, An’ did her whittle draw, man; An’ swoor fu’ rude, thro’ dirt an’ blood, To mak it guid in law, man. printed 311–315; PDF 359–363 https://archive.org/details/poemschieflyins00burn