My Nanie, O Scots Musical Museum · 1839 Behind yon hills where riv’lets row, Are moors an’ mosses many O; The wint’ry sun the day has clos’d An’ I’ll away to Nannie O; The westlin wind blaws loud an’ shrill, The night’s baith mirk an’ rainy O; I’ll get my plaid an’ out I’ll steal, An’ o’er the hill to Nannie O, To Nannie O to Nannie O; I’ll get my plaid an’ out I’ll steal, An’ o’er the hill to Nannie O. My Nannie’s charming, sweet, and young, Nae artfu’ wiles to win ye O; May ill befa’ the flattering tongue, That wad beguile my Nannie O: Her face is fair, her heart is true, As spotless as she’s bonnie O; The op’ning gowan wat wi’ dew, Nae purer is than Nannie O. A country lad is my degree, And few there be that ken me O; But what care I how few they be, I’m welcome ay to Nannie O: My riches a’s my penny fee, And I maun guide it cannie O; But warld’s gear ne’er troubles me, My thoughts are a’ my Nannie O: Our auld guidman delights to view, His sheep an’ kye thrive bonnie O; But I’m as blythe that hauds his pleugh An’ has nae care but Nannie O: Come weel, come woe, I care na by, I’ll tak’ what Heav’n will send me O; Nae ither care in life have I, But live, and love my Nannie O. Volume VI, no. 580, printed p. 600; PDF p. 100 https://digital.nls.uk/87799447